Waiata a Horomona 6:1 Kua riro ki hea tau e aroha na, e te wahine ataahua rawa o nga wahine? kei hea tou kua peka ke te hoa aroha? kia rapu tahi ai matou me koe. 6:2 Kua riro taku e aroha nei ki raro, ki tana kari, ki nga tupuranga o nga kinaki kakara, ki te kai ki nga kari, ki te kohi rengarenga. 6:3 Na taku e aroha nei ahau, a naku taku e aroha nei: kei nga rengarenga ia e whangai ana i tana kahui. 6:4 He ataahua koe, e toku hoa, he pera me Tirita; he ataahua koe, pera me Hiruharama, whakamataku hei ope whai kara. 6:5 Tahuri atu ou kanohi i ahau, ka riro hoki ahau ia raua: ko ou makawe, rite tonu he kahui koati i puta mai i Kireara. 6:6 Ko ou niho, ano he kahui hipi uha e haere mai ana i te horoi he mahanga ratou katoa, kahore hoki he pakoko i roto ia ratou. 6:7 Rite tonu ki tetahi wahi o te pamekaranete ou rahirahinga i muri i tou arai. 6:8 E ono tekau enei kuini, e waru tekau nga wahine iti, me nga wahine kore tau. 6:9 Ko taku kukupa, ko taku mea pokekore, he mea kotahi noa; ko ia anake o tona whaea, ko ia anake ko tana wahine i whanau ai. Ka kite nga tamahine i a ia, a i manaaki i a ia; ae ra, ko nga kuini me nga wahine iti, whakamoemiti ana ratou ki a ia. 6:10 Ko wai tenei e matakitaki mai nei, ano ko te ata, ataahua tonu, ano ko te marama, marama rawa? te ra, he whakamataku hoki, ano he taua e mau kara ana? 6:11 I haere ahau ki raro ki te kari nati, kia kite i nga hua o te awaawa, a kia kite e tupu ana ranei te waina, kua kopuku ranei nga pamekaranete. 6:12 Mohio rawa ake ahau kua meinga ahau e toku wairua kia tau ki waenga ki nga hariata o Aminaripi. 6:13 Hoki mai, hoki mai, e te Hurami; hoki mai, hoki mai, kia titiro atu matou ki a koe. He aha ta koutou e kite ai i te Hurami? Me te mea ko te ropu o nga ope e rua.