Waiata a Horomona 3:1 I te po, i runga i toku moenga, i rapua e ahau ta toku wairua i aroha ai: i rapua e ahau, ko ahau ia kihai i kitea. 3:2 Ka whakatika ahau aianei, ka kopikopiko i roto i te pa i nga huarahi, i te whanui Ka rapua e ahau ta toku wairua i aroha ai: i rapua e ahau, heoi kua kitea kaore. 3:3 I tutaki ki ahau nga kaitiaki e kopikopiko nei i roto i te pa: Ano ra ko ahau ki a ratou, I kite koutou ia ia ko wai e arohaina ana e toku wairua? 3:4 He iti kau nei kua pahemo atu ahau ia ratou, a ka kitea e ahau taku i pai ai e aroha ana te wairua: I puritia ia e ahau, kihai hoki i tukua atu, kia kawea mai ra ano e ahau ki te whare o toku whaea, ki te ruma o te wahine e hapu ana ahau. 3:5 He ki tenei naku ki a koutou, e nga tamahine o Hiruharama, i te aroaro o nga anaterope, o nga hata i te parae, kei whakaohokia e koutou, kei whakaarahia taku e aroha nei, kia pai ra ano ia. 3:6 Ko wai tenei e whakaputa mai nei i te koraha, ano ko nga pou paowa? he mea kakara i te maira, i te parakihe, i nga puehu katoa a te kaihoko? 3:7 Nana, ko te amo o Horomona; e ono tekau nga tangata maia i tetahi taha ona, i tetahi taha, o nga maia o Iharaira. 3:8 He hunga mau hoari ratou katoa, he mea whakaako ki te whawhai; tona huha i te wehi i te po. 3:9 I hanga e Kingi Horomona he hariata mona, no Repanona te rakau. 3:10 I hanga ano ona pou ki te hiriwa, he koura a raro he papura te uhi o taua mea, he mea whariki a waenganui ki te aroha, no te mea nga tamahine o Hiruharama. 3:11 Haere, e nga tamahine o Hiona, ka matakitaki ia Kingi Horomona me te karauna i karaunatia ai ia e tona whaea i te ra o tana marenatanga, i te ra o te hari o tona ngakau.