Waiata a Horomona 2:1 He puawai ahau no Harono, he rengarenga no nga awaawa. 2:2 He rengarenga i roto i nga tataramoa, ko taku e aroha nei i roto i nga tamahine. 2:3 Kei te aporo i roto i nga rakau o te ngahere te rite o taku kaingakau i roto i nga rakau nga tama. Nui atu toku koa i noho ai i raro i tona taumarumarunga iho, me ona hua he reka ki taku reka. 2:4 I kawea ahau e ia ki te whare hakari, a ko tona kara i runga i ahau he aroha. 2:5 Whakakahangia ake ahau ki te karepe whakamaroke, whakahauorangia ahau ki te aporo; e mate ana hoki ahau i te aroha. 2:6 Kei raro i toku mahunga tona maui, e awhi ana tona matau i ahau. 2:7 He ki tenei naku ki a koutou, e nga tamahine o Hiruharama, i te aroaro o nga anaterope, o nga hata i te parae, kei whakaohokia e koutou, kei whakaarahia taku e aroha nei, kia pai ra ano ia. 2:8 Ko te reo o taku e aroha nei! nana, te haere mai nei ia e tupekepeke ana i runga i nga maunga. mokowhiti ana i runga i nga puke. 2:9 Rite tonu ki te anaterope, ki te kuao hata taku e aroha nei: tenei ia te tu mai nei i muri i to maua taiepa, titiro mai ana ia ki nga matapihi, e whakaatu mai ana ra roto i te reiti. 2:10 I korero mai taku e aroha nei, i mea mai ki ahau, E ara, e taku ipo, e taku mea ataahua, e toku hoa. haere mai. 2:11 Nana, kua pahemo te hotoke, kua mutu te ua, kua kore; 2:12 Kua puta nga puawai ki runga ki te whenua; ko te wa e waiatatia ai nga manu haere mai, ka rangona te reo o te kukupa ki to tatou whenua; 2:13 Kua kopuku nga hua hou o te piki, kua pihi ake nga waina he kakara pai te karepe. Whakatika, e taku ipo, e taku mea ataahua, haere mai. 2:14 E taku kukupa i roto i nga kapiti o te kamaka, i nga wahi ngaro o te te pikitanga, kia kite ahau i tou ahua, kia rongo ahau i tou reo; mo te reka ko tou reo, he ataahua tou mata. 2:15 Hopukia mai ma taua nga pokiha, nga pokiha ririki e takakino nei ia taua mara waina: mo a tatou waina. he karepe hou. 2:16 Naku taku kaingakau, nana hoki ahau: kei waenga ia i nga rengarenga e whangai ana i tana kahui. 2:17 I te mea kiano i matao noa te ra, a kiano i rere noa nga atarangi, tahuri mai, e taku e aroha nei, kia noho tonu. kei te anaterope koe, kei te kuao hata ranei i runga i nga maunga o Petere.