Waiata 30:1 Ka whakanui ahau ia koe, e Ihowa; nau hoki ahau i hapai ake, a kahore i hanga e koe kia koa mai oku hoariri ki ahau. 30:2 E Ihowa, e toku Atua, i karanga ahau ki a koe, a kore ake toku mate ia koe. 30:3 E Ihowa, nau i whakaputa ake toku wairua i te reinga; nau ahau i tiaki e ora ana, kei heke ahau ki te poka. 30:4 Waiata ki a Ihowa, e tana hunga tapu, whakawhetai hoki ki a Ihowa te maharatanga ki tona tapu. 30:5 He iti hoki te wahi e riri ai ia; kei a ia te oranga: he tangi ka tatari mo te po, a i te ata he hari. 30:6 I mea ahau i toku wa i kake ai, E kore ahau e whakangaueuetia a ake ake. 30:7 He manakohanga nau, e Ihowa, iu ai ia koe te tu o toku maunga: ko koe i huna e koe tou mata, a raru ana ahau. 30:8 E Ihowa, i karanga ahau ki a koe; i inoi hoki ahau ki a Ihowa. 30:9 He aha te pai o oku toto ina heke ahau ki te poka? Ma te te puehu te whakamoemiti ki a koe? e korero ranei i tou pono? 30:10 Whakarongo, e Ihowa, tohungia hoki ahau: e Ihowa, ko koe hei awhina moku. 30:11 Kua puta ke ia koe taku tangi hei kanikani: kua whakarerea e koe taku tangi he kakahu taratara, whitikiria ana ahau ki te koa; 30:12 Hei mea e himene ai toku kororia ki a koe, kore ake e wahangu. O E Ihowa, e toku Atua, ka whakawhetai ahau ki a koe ake ake.