Waiata 3:1 ¶ E Ihowa, ano te tini o te hunga e raru ana i ahau! he tokomaha te hunga e whakatika ana ki ahau. 3:2 He tokomaha te mea ana ki toku wairua, hore rawa he awhina mona i te Atua. Hera. 3:3 Ko koe ia, e Ihowa, hei whakangungu rakau moku; toku kororia, me te kaiwhakaara o toku upoko. 3:4 I karanga toku reo ki a Ihowa: a whakahoki kupu mai ana ia ki ahau i roto i tona tapu puke. Hera. 3:5 I takoto ahau, i moe; I oho ahau; na Ihowa hoki ahau i tautoko ake. 3:6 E kore ahau e wehi i nga mano tini o te hunga kua tu ko ratou ano ki ahau i tetahi taha, i tetahi taha. 3:7 Whakatika, e Ihowa; whakaorangia ahau, e toku Atua: nau hoki i patu oku hoariri katoa i runga i te paparinga; whatiia ana e koe nga niho o te hunga kino. 3:8 Na Ihowa te whakaoranga: kei runga i tau iwi tau manaaki. Hera.