Hone 4:1 A, no ka mohio te Ariki kua rongo nga Parihi ki ta Ihu i hanga ai a he tokomaha atu nga akonga i iriiri i a Hoani, 4:2 (Heoi ehara i a Ihu nana i iriiri, engari ko ana akonga;) 4:3 Ka mahue ia ia Huria, a hoki ana ano ki Kariri. 4:4 Na, ko te ara mona i tika na Hamaria. 4:5 Na ka haere ia ki tetahi pa o Hamaria, ko Haika te ingoa, e patata ana ki a ratou te wahi whenua i hoatu e Hakopa ki tana tama, ki a Hohepa. 4:6 Kei reira hoki te puna a Hakopa. Na ka ngenge a Ihu i ana i te haerenga, noho ana i te taha o te puna: a tata tonu ki te ono o nga haora. 4:7 Ka haere mai tetahi wahine o Hamaria ki te utu wai: ka mea a Ihu ki a ia, Homai kia inu ahau. 4:8 Kua riro hoki ana akonga ki te pa, ki te hoko kai. 4:9 Na ka mea te wahine o Hamaria ki a ia, He aha koe i a E te Hurai, ka tono mai i te wai i ahau, he wahine nei ahau no Hamaria? na nga Hurai hoki kahore he mahi ki nga Hamari. 4:10 Ka whakahoki a Ihu, ka mea ki a ia, Me i matau koe ki ta te Atua homaitanga, a ko wai tenei e mea na ki a koe, Homai he wai moku; kua ui mai ano koe mana, a kua hoatu e ia he wai ora ki a koe. 4:11 Ka mea te wahine ki a ia, E kara, kahore au mea hei utu wai, me te he hohonu te puna: no hea tena wai ora au? 4:12 He nui oti koe i to matou matua, ia Hakopa, i homai te puna ki a matou, a i inu ano ia, ratou ko ana tamariki, me ana kararehe? 4:13 Ka whakahoki a Ihu, ka mea ki a ia, Ki te inu tetahi i tenei wai, e inu ano ia matewai ano: 4:14 Tena ko te tangata e inu ana i te wai e hoatu e ahau ki a ia, e kore rawa ia e inu matewai; engari te wai e hoatu e ahau ki a ia, hei puna ano i roto i a ia he wai e pupu ake ana ki te ora tonu. 4:15 Ka mea te wahine ki a ia, E kara, homai tenei wai ki ahau, kei mate ahau i te wai. kaua hoki e haere mai ki te utu. 4:16 Ka mea a Ihu ki a ia, Tikina, karangatia to tahu, ka hoki mai ai. 4:17 Ka whakahoki te wahine, ka mea, Kahore aku tahu. Ka mea a Ihu ki a ia, He korero pai tau, Kahore aku tahu: 4:18 Ina hoki kua tokorima au tahu; ko te mea ia koe inaianei ehara i a koe tane: he pono tau korero. 4:19 Ka mea te wahine ki a ia, E kara, e kite ana ahau he poropiti koe. 4:20 I karakia o matou matua i runga i tenei maunga; a e mea ana koutou, kei Hiruharama ko te wahi e tika ai nga tangata ki te karakia. 4:21 Ka mea a Ihu ki a ia, E tai, whakapono ki ahau, meake puta te wa e whakapono ai korua kaua ano i runga i tenei maunga, kahore ano i Hiruharama, e karakia ki te Matua. 4:22 Kahore koutou e mohio ki ta koutou e karakia nei: e matau ana matou ki ta matou e karakia nei: no te mea ko te ora o nga Hurai. 4:23 Otira meake puta te wa, a tenei ano, e karakia ai nga kaikarakia pono te Matua i roto i te wairua me te pono: e rapu ana hoki te Matua ki te pera koropiko ki a ia. 4:24 He Wairua te Atua: me karakia hoki nga kaikarakia ki a ia i runga i te wairua me te pono. 4:25 Ka mea te wahine ki a ia, E matau ana ahau kei te haere mai te Mihaia, e kiia nei ko Te Karaiti: ka tae mai ia, mana e korero nga mea katoa ki a tatou. 4:26 Ka mea a Ihu ki a ia, Ko ahau ano ia e korero nei ki a koe. 4:27 Na ka puta i reira ana akonga, ka miharo ki tana korerotanga ki a ratou wahine: heoi kihai tetahi i mea, He aha tau e rapu na? he aha koe i korero ai? ia? 4:28 Na ka whakarerea e te wahine tana ipu wai, a haere ana ki te pa, a ka mea ki nga tangata, 4:29 Haere mai, kia kite i te tangata i korerotia mai ki ahau nga mea katoa i mea ai ahau: ehara ranei tenei i te mea te Karaiti? 4:30 Ka puta ratou ki waho o te pa, a ka ahu mai ki a ia. 4:31 I taua takiwa ano ka tohe nga akonga ki a ia, ka mea, E te Kaiwhakaako, e kai ra. 4:32 Otira ka mea ia ki a ratou, he kai ano taku hei kai maku, kahore koutou e matau. 4:33 Na ka mea nga akonga tetahi ki tetahi, I kawea mai ranei e tetahi ki a ia me kai? 4:34 Ka mea a Ihu ki a ratou, Ko taku kai tenei, ko te mea i ta toku kaitono e pai ai. me te whakaoti i tana mahi. 4:35 E kore ianei koutou e mea, Kia wha atu nga marama, a ka taea te kotinga? nana, Ko taku kupu tenei ki a koutou, Kia ara ake o koutou kanohi, titiro ki nga mara; ko ratou hoki kua ma ki te hauhake. 4:36 Ka whiwhi te kaikokoti ki te utu, ka kohia ano hoki e ia nga hua mo te ora mau tonu: kia hari tahi ai te kairui raua ko te kaikokoti tahi. 4:37 Na konei i pono ai taua ki, E rui ana tetahi, e kokoti ana tetahi. 4:38 I tonoa koutou e ahau ki te kokoti i te mea kihai i mahia e koutou: he tangata ke i mahi, a kua uru koutou ki a ratou mahi. 4:39 A he tokomaha nga Hamari o taua pa i whakapono ki a ia, mo taua kupu o te wahine i whakaatu mai, I korerotia mai e ia ki ahau nga mea katoa i mea ai ahau. 4:40 A, no ka tae mai nga Hamari ki a ia, ka tohe ki a ia ka noho ia ki a ratou: ae rua nga ra i noho ai ia ki reira. 4:41 Na hira noa ake nga tangata i whakapono, he mea hoki na tana ake kupu; 4:42 I mea ano ki te wahine, Ehara i te mea na tau kupu i whakapono ai matou inaianei: engari kua rongo ano matou ki a ia, kua matau, ko te Karaiti pu tenei; te Kaiwhakaora o te ao. 4:43 ¶ Ka pahure nga ra e rua, ka turia atu e ia i reira, a haere ana ki Kariri. 4:44 Ko Ihu tonu hoki nana te ki, Kahore he honore o te poropiti ia ia ake whenua. 4:45 Heoi, i tona taenga ki Kariri, ka whakamanuhiritia ia e nga tangata o Kariri i kite hoki ia i nga mea katoa i mea ai ia ki Hiruharama i te hakari: i kite hoki ratou i haere ki te hakari. 4:46 A ka tae ano a Ihu ki Kana o Kariri, ki te wahi i meatia ai e ia te wai hei waina. Na ko tetahi tangata rangatira kei Kaperenauma tana tama. 4:47 A, no ka rongo ia kua tae mai a Ihu i Huria ki Kariri, ka haere ki a ia, ka inoi ki a ia kia haere ia ki te whakaora i tana tama. kua tata hoki ia ki te mate. 4:48 Na ko te meatanga a Ihu ki a ia, Ki te kahore koutou e kite i nga tohu, i nga merekara, e kore rawa koutou e kite whakapono. 4:49 Ka mea te tangata a te kingi ki a ia, E te Ariki, haere iho i te mea kahore ano kia mate noa taku tamaiti. 4:50 Ka mea a Ihu ki a ia, Haere; kua ora tau tama. Na ka whakapono taua tangata te kupu i korerotia e Ihu ki a ia, a haere ana ia. 4:51 A, i a ia e haere ana, ka tutaki ana pononga ki a ia, ka korero, ka mea, Kua ora tau tama. 4:52 Na ka ui ia ki a ratou ki te haora i matutu ake ai ia. Na ka mea ratou ki a ia, Nonanahi, no te whitu o nga haora, i mutu ai tona kirika. 4:53 Na ka mohio te papa, ko te tino haora ia i korero ai a Ihu ki a ia, Kua ora tau tama: a whakapono ana ia, ratou ko tona whare katoa. 4:54 Ko te rua ano tenei o nga merekara i meatia e Ihu, i tona putanga mai i roto Huria ki Kariri.