Hopa 35:1 I korero ano a Erihu, i mea, 35:2 Ki tou whakaaro he tika tenei mau e ki ana, Ko toku tika tenei nui atu i ta te Atua? 35:3 I mea ai koe, He aha te rawa ki a koe? a, He aha te pai? ka whiwhi ranei ahau ki te mea kua ma ahau i toku hara? 35:4 Maku e whakahoki he kupu ki a koe, ki a koe ko ou hoa. 35:5 Kia matatau atu tau titiro ki nga rangi; titiro atu hoki ki nga kapua kei runga noa atu i a koe. 35:6 Ki te hara koe, ka aha koe ki a ia? ki te mea ranei o koutou he kia tini koe, e aha ana koe ki a ia? 35:7 Ki te mea he tika koe, ko te aha e hoatu ana e koe ki a ia? he aha ranei tana e whiwhi ai tou ringa? 35:8 Ka mamae pea tetahi tangata pena ia koe na i tou kino; ka mau ano tou tika he pai mo te tama a te tangata. 35:9 He maha no nga tukinotanga i meinga ai e ratou te tangata e tukinotia ana karanga: na te ringaringa o te hunga kaha ratou i aue ai. 35:10 Kahore ia tetahi e mea ana, Kei hea toku Kaihanga, te Atua, e homai nei i nga waiata i te po; 35:11 E nui atu nei tana whakaako ia tatou i o nga kararehe o te whenua, nana hoki tatou i whai whakaaro ai i to nga manu o te rangi? 35:12 Karanga ana ratou i reira, heoi kahore he kupu e whakahokia mai, na te whakapehapeha o te kino tane. 35:13 He pono e kore te tekateka noa e whakarangona mai e te Atua, e kore ano hoki e tirohia mai e te Kaha Rawa. 35:14 Ka iti rawa iho ki te mea koe, kahore koe e kite ia ia, kei tona aroaro te whakarite whakawa; na reira whakawhirinaki koe ki a ia. 35:15 Na, kare ano ia i tae mai i runga i tona riri; heoi ko ia e kore e mohiotia e ia i te mutunga o te wa. 35:16 Koia i puaki ai te mangai o Hopa, he mea horihori kau nei; ko waho ka whakanuia e ia nga kupu matauranga.