Hopa 26:1 Na ka whakautu a Hopa, ka mea, 26:2 He hapai pehea tau i te kahakore? he pehea tau whakaora i te ringa? kahore nei he kaha? 26:3 I pehea tau whakatakoto i te whakaaro nui mo te tangata whakaarokore? kei te pehea koe i whakapuakina nuitia taua mea? 26:4 I korero kupu koe ki a wai? ko wai hoki te wairua i puta mai i a koe? 26:5 E wiri ana nga tupapaku i raro i te wai, me nga tangata ano o reira. 26:6 E takoto kau ana te reinga i tona aroaro, kahore hoki he hipoki mo te whakangaro. 26:7 E horahia atu ana e ia te raki ki runga ki te wahi takoto kau, whakairihia ana e ia te whenua i runga i tetahi mea. 26:8 E takaia ana e ia nga wai ki roto ki ana kapua matotoru; kahore hoki te kapua i pakaru i raro ia ratou. 26:9 E kaiponuhia ana e ia a mua o tona torona, horahia ana e ia tana kapua ki runga. 26:10 He mea karapoti nana nga wai, rohe rawa, a taea noatia te ao me te po ki te mutunga. 26:11 Wiri ana nga pou o te rangi, miharo ana ki tana ako. 26:12 Ko tona kaha hei whakakorikori i te moana, maru ana tona matauranga na roto i te hunga whakakake. 26:13 Na tona wairua i whakapaipai nga rangi; na tona ringa i hanga nakahi pikopiko. 26:14 Nana, he wahanga enei no ona ara; ano te iti o te wahi e rangona ana ia? engari ko te whatitiri o tona kaha ko wai ka matau?