Mga Salmo 108:1 ΒΆ Oh Dios, ang akong kasingkasing malig-on; Magaawit ako ug magahatag ug pagdayeg, bisan uban sa akong himaya. 108:2 Pagmata, salterio ug alpa: Ako sa akong kaugalingon magamata ug sayo. 108:3 Pagadayegon ko ikaw, Oh Jehova, sa taliwala sa mga katawohan; Ug magaawit ako ug mga pagdayeg kanimo sa taliwala sa mga nasud. 108:4 Kay ang imong mahigugmaong-kalolot daku man ibabaw sa mga langit, Ug ang imong kamatuoran moabut ngadto sa ang mga panganod. 108:5 Pagabayawon ka, Oh Dios, ibabaw sa kalangitan: Ug ang imong himaya labaw sa tanang yuta; 108:6 Aron maluwas ang imong hinigugma: Luwasa uban sa imong toong kamot, ug tubaga kanako. 108:7 Ang Dios misulti diha sa iyang pagkabalaan; Magakalipay ako, bahinon ko ang Sichem, ug sukda ang walog sa Succoth. 108:8 Ang Galaad ako man; Akoa si Manases; Ang Ephraim usab mao ang akong kusog ulo; Ang Juda mao ang akong maghahatag-balaod; 108:9 Ang Moab mao ang akong hugasanan; sa ibabaw sa Edom isalibay ko ang akong sapin; ibabaw sa Filistia magmadaugon ba ako. 108:10 Kinsa ba ang modala kanako ngadto sa ciudad nga malig-on? kinsay modala kanako ngadto sa Edom? 108:11 Dili ba ikaw, Oh Dios, nga nagsalikway kanamo? ug dili ba ikaw, Oh Dios, moadto uban sa atong mga panon? 108:12 Hatagi kami ug tabang gikan sa kasamok; Kay kawang ang tabang sa tawo. 108:13 Pinaagi sa Dios kita magabuhat nga maisugon: Kay siya mao ang magatunob atong mga kaaway.