Mga Salmo 84:1 ΒΆ Pagkahiligugmaon sa imong mga tabernaculo, Oh Jehova sa mga panon! 84:2 Ang akong kalag gihidlaw, oo, bisan pa sa mga sawang ni Jehova: ang akong kasingkasing ug ang akong unod nagatu-aw alang sa buhi nga Dios. 84:3 Oo, ang goryon nakakaplag ug balay, ug ang sayaw ug usa ka salag sa iyang kaugalingon, diin ibutang niya ang iyang mga nati, bisan ang imong mga halaran, Oh Jehova sa panon, akong Hari, ug akong Dios. 84:4 Bulahan sila nga nanagpuyo sa imong balay: Sa gihapon managdayeg sila kanimo. Selah. 84:5 Bulahan ang tawo kansang kusog anaa kanimo; kang kinsang kasingkasing anaa ang mga paagi nila. 84:6 Nga nagalakaw latas sa walog sa Baca, naghimo niini nga usa ka atabay; ang ulan usab nagpuno sa mga linaw. 84:7 Sila nangadto gikan sa kusog ngadto sa kalig-on, ang tagsatagsa kanila mitungha sa Sion atubangan sa Dios. 84:8 Oh Jehova nga Dios sa mga panon, patalinghugi ang akong pag-ampo: Patalinghugi, Oh Dios ni Jacob. Selah. 84:9 Tan-awa, Oh Dios nga among taming, ug tan-awa ang nawong sa imong dinihog. 84:10 Kay ang usa ka adlaw diha sa imong mga sawang labi pang maayo kay sa usa ka libo. Mas maayo ko nga mahimong usa ka magbalantay sa pultahan sa balay sa akong Dios, kay sa pagpuyo sa mga balong-balong sa pagkadautan. 84:11 Kay si Jehova nga Dios mao ang adlaw ug ang kalasag: Si Jehova mohatag sa gracia ug himaya: walay maayong butang nga iyang ihikaw kanila nga nagalakaw sa matul-id. 84:12 Oh Jehova sa mga panon, bulahan ang tawo nga nagasalig kanimo.