Jeremias 43:1 ΒΆ Ug nahitabo, nga sa nakatapus na si Jeremias sa pagsulti kaniya ang tibook katawohan sa tanang mga pulong ni Jehova nga ilang Dios, nga alang niini si Jehova ang ilang Dios nagpadala kaniya ngadto kanila, bisan kining tanan nga mga pulong, 43:2 Unya namulong si Azarias ang anak nga lalake ni Osaias, ug si Johanan ang anak nga lalake ni Carea, ug ang tanang mapahitas-on nga mga tawo, nga nagaingon kang Jeremias: Ikaw nagasulti ug bakak: ang Si Jehova nga atong Dios wala magpadala kanimo sa pag-ingon: Ayaw pag-adto sa Egipto sa paglangyaw didto: 43:3 Apan si Baruch ang anak nga lalake ni Nerias nagbutang kanimo batok kanamo, aron sa pagluwas kami ngadto sa kamot sa mga Caldeahanon, aron ilang pamatyon kami, ug dad-a kami nga mga binihag ngadto sa Babilonia. 43:4 Busa si Johanan ang anak nga lalake ni Carea, ug ang tanang mga capitan sa kasundalohan, ug ang tibook katawohan, wala managtuman sa tingog ni Jehova, sa pagpuyo sa yuta sa Juda. 43:5 Apan si Johanan ang anak nga lalake ni Carea, ug ang tanang mga capitan sa kasundalohan, mikuha ang tanan nga salin sa Juda, nga namalik gikan sa tanan nga mga nasud, diin sila giabug, sa pagpuyo sa yuta sa Juda; 43:6 Bisan ang mga lalake, ug mga babaye, ug mga bata, ug ang mga anak nga babaye sa hari, ug ang tanan tawo nga gibilin ni Nebuzaradan nga kapitan sa mga guwardiya kang Gedalias ang anak nga lalake ni Ahicam ang anak nga lalake ni Saphan, ug si Jeremias nga manalagna, ug si Baruc nga anak ni Nerias. 43:7 Busa sila miadto sa yuta sa Egipto, kay sila wala motuman sa tingog ni si Jehova: sa ingon niini sila ming-abut bisan sa Tapnes. 43:8 Unya midangat ang pulong ni Jehova kang Jeremias sa Tapnes, nga nagaingon: 43:9 Pagdala ug dagkung mga bato sa imong kamot, ug tagoi sila sa lapok diha sa yuta sunoganan sa tisa, nga anaa sa ganghaan sa balay ni Paraon sa Tapanhes, sa panan-aw sa mga tawo sa Juda; 43:10 Ug umingon ka kanila: Mao kini ang giingon ni Jehova sa mga panon, ang Dios sa Israel; Ania karon, akong ipadala ug kuhaon si Nabucodonosor ang hari sa Babilonia, akong alagad, ug igabutang niya ang iyang trono sa ibabaw niining mga bato nga akong gitagoan; ug ibuklad niya ang iyang harianong pavilion sa ibabaw nila. 43:11 Ug sa diha nga siya moabut, siya modasmag sa yuta sa Egipto, ug magaluwas kanila ingon nga alang sa kamatayon ngadto sa kamatayon; ug kadtong alang sa pagkabihag ngadto sa pagkabihag; ug kadtong alang sa espada ngadto sa espada. 43:12 Ug dauban ko sa kalayo ang mga balay sa mga dios sa Egipto; ug siya pagasunogon sila, ug pagadad-on sila nga mga binihag: ug siya magabisti sa iyang kaugalingon uban sa yuta sa Egipto, ingon sa usa ka magbalantay nga nagsul-ob sa iyang kupo; ug siya mobiya gikan didto sa kalinaw. 43:13 Iyang pagadugmokon usab ang mga larawan sa Beth-semes, nga anaa sa yuta sa Ehipto; ug ang mga balay sa mga dios sa mga Egiptohanon iyang pagasunogon kalayo.