Genesis 13:1 ΒΆ Ug si Abram mitungas gikan sa Egipto, siya ug ang iyang asawa, ug ang tanan nga iya; ug si Lot uban kaniya, ngadto sa habagatan. 13:2 Ug si Abram dato kaayo sa kahayupan, sa salapi, ug sa bulawan. 13:3 Ug siya mipadayon sa iyang mga panaw gikan sa habagatan ngadto sa Bethel, ngadto sa dapit diin didto ang iyang tolda sa sinugdan, taliwala sa Bethel ug Hai; 13:4 Ngadto sa dapit sa halaran, nga iyang gibuhat didto sa sinugdan: ug didto si Abram nagsangpit sa ngalan ni Jehova. 13:5 Ug usab si Lot, nga miuban kang Abram, may mga panon sa carnero, ug mga vaca, ug mga balong-balong. 13:6 Ug ang yuta wala makapaigo kanila, aron sila makapuyo sa tingub. kay ang ilang bahandi daghan, mao nga dili sila makapuyo nga tingub. 13:7 Ug dihay pagkabingkil sa taliwala sa mga magbalantay sa kahayupan ni Abram ug sa mga magbalantay sa kahayupan ni Lot: ug ang Canaanhon ug ang Peresehanon nanagpuyo unya sa yuta. 13:8 Ug si Abram miingon kang Lot: Hinaut unta nga walay pagkabingkil, ako nagahangyo kanimo, sa taliwala kanako ug ikaw, ug sa taliwala sa akong mga magbalantay ug sa imong mga magbalantay; kay kita managsoon. 13:9 Dili ba ang tibook yuta anaa sa atubangan mo? ibulag ang imong kaugalingon, ako nagahangyo kanimo, gikan sa ako: kong ikaw moadto sa wala nga kamot, nan ako moadto sa too; o kung moadto ka sa too, unya moadto ako sa wala. 13:10 Ug giyahat ni Lot ang iyang mga mata, ug nakita niya ang tibook nga Kapatagan sa Jordan, nga kini natubigan pag-ayo bisan asa, sa wala pa laglaga ni Jehova ang Sodoma ug Gomorra, bisan ingon sa tanaman ni Jehova, sama sa yuta sa Egipto, ingon mianhi ka sa Zoar. 13:11 Unya gipili ni Lot alang kaniya ang tibook nga Kapatagan sa Jordan; ug si Lot mipanaw sa sidlakan: ug gibulag nila ang usa gikan sa usa. 13:12 Si Abram mipuyo sa yuta sa Canaan, ug si Lot mipuyo sa mga lungsod sa sa kapatagan, ug gipatindog niya ang iyang balongbalong paingon sa Sodoma. 13:13 Apan ang mga tawo sa Sodoma mga dautan ug mga makasasala sa atubangan ni Jehova hilabihan. 13:14 Ug si Jehova miingon kang Abram, sa tapus nga si Lot makabulag kaniya, Iyahat karon ang imong mga mata, ug tan-awa gikan sa dapit diin ikaw atua amihanan, ug habagatan, ug silangan, ug kasadpan: 13:15 Kay ang tibook nga yuta nga imong ginatan-aw, kini ihatag ko kanimo, ug sa imo binhi hangtod sa kahangtoran. 13:16 Ug pagabuhaton ko ang imong kaliwatan ingon sa abug sa yuta, aron nga kong ang usa ka tawo makahimo isipa ang abug sa yuta, unya ang imong kaliwat usab maisip. 13:17 Tumindog ka, lumakaw ka latas sa yuta sa iyang gitas-on ug sa iyang gilapdon kini; kay ihatag ko kini kanimo. 13:18 Unya si Abram mipahawa sa iyang balongbalong, ug miadto ug mipuyo sa kakahoyan sa Mamre. nga atua sa Hebron, ug nagtukod didto ug usa ka halaran alang kang Jehova.